Под изговор дека бара работа, за неполн месец, поточно од крајот на декември минатата и почетокот на овој месец од оваа година, успеал да „олесни“ десет приватни конфекции, а во серијалот тешки кражби, штипјанецот Г.С. провалил во над десетина домови на сограѓани. Од таму крадел техничка стока. Украдените предмети, како це де плеери, лаптоп компјутери, мобилни телефони, домашни аудио и видео системи, како и алат за работа веднаш ги препродавал.

Крадецот, кој според полицијата не бил досега на списокот на познати криминалци, работел сам. Влегувал и во државни институции, како штипскиот Центар за вработување.

Низата од 16 тешки кражби, штипската полиција ја прекинала вчера, откако по претходни оперативни сознанија од терен, успеала на лице место, како краде во куќа во централното градско подрачје, да го фати и приведе 32 годишниот разбојник.

Вредноста на украдените предмети дополнително ќе се утврдува, а по комплетирање на доказниот материјал против истиот ќе биде поднесена кривична пријава.